1917iTEAMS 4-gipa Digital Transformation Awards 2021-ko che.aha ine parakaha

0
76

1917iTEAMS, ian Meghalaya sorkarini gam’a ge’ani karkanao ge.’sa project ong’a jeon ‘Digital Transformation in Agriculture’ ba  ‘Gitalgipa budirangko jakale gam’a ge’ani karkanako dingtangatani’ bimungo pangchake 4-gipa Digital Transformation Awards 2021-ko (Nambegipa e-Governance-o gisik ra’aniko man’aha) November-ni 18 tarik 2021-o rakbee kam ka’anichi che’aha aro bimchipe kam ka’anichi ian India a’songko gam’a ge’ani karkanao gitalgipa budirangko jakalanio niksengataniba ong’aha.

 

Shri. P. Sampath Kumar, IAS, Agriculture-ni gitcham Commissioner aro Secretary-ni chanchidile a’bachengdilgipa kam, 1917-Integrated Technology Enabled Agri-Management System (1917iTEAMS)-ara gital changa sapani, gam’giparangko dondime kam ka’ani, bajar antirangchi bosturangko sokatani, Meghalaya a’doko donggipa pilak gam’giparangko dongani kri dakchakani chol ong’a. Ian 2017 December ja dibet a’bachenge gam’giparangko bajar antirangchi nangrimate  on’an baksa dingtang dingtang man’a kragipa kupatianirangko on’aha, bajar antirangchi bosturangko sokataha aro gam’a ge’ani bidingo bangen kupatianirangko on’aha. Unbaksana sak 88,000 gam’giparangko segataha, sak 600-na baten bre’giparangko segataha, sak 400-na baten gam’gipa dolrangko segataha aro ge-18 garirangko Meghalaya a’dokni gita on’aha, 1917iTEAMS tangka paisa nang’gijagipa nombor 1917-ko gam’giparangna on’aha, bang’gija segatanirangko dakaha, dingtang dingtang biaprangchi sokataniko dakaha, uigipa masigiparangko rakiaha aro nangchongmotgipa kusiliting IVRS-ko tariaha. Iako tarigipa dolara Digital India Corporation (DIC), Ministry of Electronics and Information Technology, Government of India-chi dakdilaha.

 

1917iTEAMS-ara nengnikgijan a’doko, chigao, a’songo aro a’gilsak gimikchian gam’giparangko bre’egiparang baksa nangrimgrikate on’enga je uchin a’doko man’gipa dingtangmancha bosturangko gipinchi palatna bangen dakchakani cholba ong’enga. Garirangko songrangchi, gam’giparangchi, bre’egiparangchi, dolrangchi, songo noko dol dake kuligiparangchi aro uandakgiparangchi jakalna man’enga aro a’dokni kona noksikrangchi re’ange banga nam’gipa bajarangchi somoi gita sokate on’enga.

 

1917iTEAMS-ara chugimik department of Agriculture & Farmers’ Welfare-chi dakchakaniko man’enga aro dingtang dingtang department baksa melie kamrangko ka’enga jekai Animal Husbandry & Veterinary, Fisheries, Planning, Finance, Law, Information Technology, Water Resources, Dairy, the Indian Council of Agricultural Research (ICAR), the Central Agriculture University (CAU), MBDA aro State e-Governance Mission Team (S.e.M.T), iarangchin banga sorkarini kamrangko gam’giparangna ra’baenga aro ge’sa phone call ka’anichin gam’giparangko dingtang dingtang department-rang baksa sepangbate nangrimataniba ong’enga. Meghalaya Institute of Entrepreneurship (MIE) baksa nangrimanichi dingtang dingtang gam’na ge’na chang’gipa sapgiparangko a’doko bilake nangrimgrikatan baksa a’doko man’gipa dingtang dingtang bosturangkoba giprikrikatna man’a jekai lockdown-ni somoirango dingtang dingtang biaprangchi bosturangko sokataha.

 

2020 bilsi-ni somoio, 1917iTEAMS banga garirangko jakale nangani kri bosturangko salrurana lockdown-ni ba chipchangani somoirango salruraaha. 1917iTEAMS-ni garirangni gita gam’a ge’ani bosturangko taraken gam’giparangni nengnika grian somoi gita sokate on.aha. Segatgimin bre’egiparang gitalgipa mesu samjakrangko altuen bre’na man’aha aro bajar-o man’gipa bosturangkoba altuen lockdown-ni ba chipchangani somoio salrurana man’aha. NARI, East Khasi Hills District Cooperative Milk Union Ltd baksa 1917iTEAMS melie kam ka’anichi 22,375 chipchange dongenggipa nokdangrangna Chief Minister’s Quarantine Care Package-o pangchake dudrangko sokate on’a man’aha. 2021 bilsi lockdown-o, 1917iTEAMS nangchongmotgipa nokantichi sokate on.ani cholkoba tariaha aro nokantichin sokate on’aha.