NE-ni Youth Congress Assam-ni Sima Arina Golmal Ka·aniko Jegala

0
870

Mizoram, Manipur, Meghalaya, Nagaland aro Arunachal Pradesh Youth Congress-ni President rang jinma melie Joint Press Statement-ko July jani 28 tariko on•ataha. Batanggimin adita bilsirangni gisepo Assam a•dokni kragija dake sipairangni bilko jakale uni sima ari jolo songdongenggipa a•dokrangko senjetanirangko Youth Congress dolrang jegalaha. Ia indake sipai dolrangko jakale sinjetanirang Shri. Himanta Biswa Sarma-ko Chief Minister songaoni blongen batrikrikenga ine nikatna man•enga.

Sima ari jolo songdonggipa ramram manderangni dake rike cha•anio namen neng•nikaniko man•enga aro rika cho•anirangko pe•e galeming ge•a gamanirangkoba nisiatanichi songdonggipa manderangna namen neng•nikaniko on•enga ineba uamang janapaha. Indakgipa a•selrang songsa songgipin ni manderangko bingbrangate mitchigrikataona sokatan baksa Salgro Salaram jolni tom•tome donganiko olgrokata.

Ching•charikrikbaenggipa kajia golmalrangko niate nigenchim ong•ode ian North East Democratic Alliance (NEDA)-ni choligijaniko mesoka aro ia NEDA-ko bikotaniara namroro silroroanina ba tom•tome melie nangrime dongna ine miksonge ong•ja indiba Salgro Salaram gimiko BJP maikai bilko man•e sason ka•na man•gen unasan miksonge kuliaha. Himanta Biswa Sarma–ni kamko chinga raken jegala maina ua bang•a changon administration aro sipai rangko jakkale sima ario songdonggiparangko ding•grikatenga aro bian iako daito ra•na nanggen ine Youth Congress-ni dilgiparang janapaha.

Himanta Biswa Sarma-ni kam ka•ani bewalko chinga namnikja aro bia Chief Minister ong•naba kraja uni gimin Ma•mongni BJP-ni dilgiparang biko ta•raken ra•galna nanga ine  Salgro Salaram-ni Youth Congress-ni President rang gimik dabiangaha.